ذكاء مديرة ودلاخة معلمات (قصة غريبة)..

--------------------------------------------------------------------------------

هذا قصة طريفة ان شاء الله تعجبكم

يقولون الله يسلمكم أن فيه مديرة مدرسة تأخر عليها قطار الزواج وقربت تعنس ميه في الميه

لأنها من النوع اللي يحب يجمع الدراهم ولا تبي أحد يشاركها في مرتبها

ولذلك رفضت كل من طلب يدها للزواج
المهم في يوم غابت هاالمديره عن المدرسه. واستمر غيابها لمدة اسبوع.و المعلمات قلقن عليها وزاد قلقهن أنها ماترد على جوالها
وبعد الاسبوع راحت للمدرسه متعطره ومهندسة وجهها. وكاشخة في لبسها
ويوم شافوها المعلمات تجمعوا حولها يسألون عن سبب غيابها وليش ماترد عليهم بالتلفون
طالعت فيهم المديره وقالت : انا تزوجت
المعلمات تشققن من الفرح وبدأت الأسئله تنهمر على المديره من هو؟ وش مركزه؟ وعسى ماعندك جاره؟.... الخ
المديره قالت لهم أنا متزوجه زوج وحده منكم يعني أنا ضره لواحده منكن
نزل الخبر على المعلمات نزول الصاعقه. وكل وحده ماقدرت ركبها تشيلها من الروعه وكل وحده خايفه انه زوجها اللي سواها
اللي جلست على الارض واللي مسكت الكرسي لاتطيح واللي فاقه كشرتها كانها عند دكتور اسنان واللي تسندت على الجدار من الدوخه
بعدها بداءت تنهمر اسئلة الاستعطاف والترجي للمديره يبون يعرفون منهو
المديره قالت لهم ماراح اعلمكم الا بشرط
كلهم ماعندهم مانع على ها الشرط يبون يعرفون وبس
قالت لهم: بكره كل وحده تجيب 500 ريال واذا وقعت في سجل الحضور تتركها عليه.اذا اخذت ال500 معناته تراه مو زوجها واللي اترك لها الفلوس تراه زوجها لانه حرام اخذ زوجها وبعد اخذ فلوسها
وافقن على الشرط. ومن بكره كل وحده تجي وتوقع وتترك الفلوس وتروح تطل من الشباك وقلبها يردع من الخوف واذا خذتها المديره تتنفس الصعداء وكن واحد راشها بمويه بارده
تجمعوا عند الشباك وصاروا يقولون تلقينه رجل فلانه لانها لسه ماشرفت
المهم جميع المعلمات ال24 وقعن والمديره اخذت الفلوس كلها
دخلن عليها معصبات وقلن لها وش ها اللعب ماتركتي شيء كل الفلوس حطيتيها في الدرج
ناظرتهم وهي تبتسم ابتسامة صفراء وقالت: انا لاتزوجت ولا انخطبت
كنت طوال الاسبوع الماضي مريضه
قلن لها : طيب رجعي فلوسنا
قالت : معصي. من زمان وانا اترجاكم نبي نتساعد على فرش المصلى وتركيب برادة ماء
مافيه وحده منكم تبرعت
و12000 ريال هذي ابسوي بها فرش للمصلى و بشتري براد ماء
المعلمات انبسطوا ان الخبر غير صحيح وقالت وحده لوتبين 100 الف بس لاتقربي زوجي

وسلامتكم - بدون زعل -